මිනිස් ඇගිලි සලකුන එකිනෙකාගෙන් වෙනස්වන ආකාරයටම මුහුදු අශ්වයන්ගේ හිස පෙදෙසේ ඔටුන්නක්‌ ආකාරයට පිහිටි නෙරීම් සතා ගෙන් සතාට එකිනෙකට වෙනස්‌ වෙයි. නිදසුනක්‌ ලෙස එක ම විශේෂයකට අයත් මුහුදු අශ්වයන් කීප දෙනකු ගැන විමසීමක්‌ කළ හොත් මේ කිහිප දෙනා ගේ හිසේ තිබෙන නෙරීම් එකිනෙකට වෙනස්‌ වෙයි. එනම් මෙම ලක්‌ෂණය විශේෂය අනුව හා සත්ත්වයාට අනුව ද වෙනස්‌ වන බවක්‌ දක්‌නට ලැබේ. මේ ලක්‌ෂණය මුහුදු අශ්වයන් එකිනෙකා වෙන් කර හඳුනා ගැනීමට සොබාදහමෙන් ලැබී ඇති සලකුණකි.ශරීරයේ කොරපොතු නැතත් අස්‌ථිමය කවචයකින් ශරීරය වැසී ඇත.
සාමාන්‍යයෙන් ලෝකයේ මාතෘත්වය කාන්තාවන්ට පමනක් පොදු වුවත් මුහුදු අශ්වයින්ගේ පිරිමි සතා විසින් මාතෘත්වයේ වගකීම් ඉටුකරනු ලබයි. ගැහැනු සතා පිරිමි සතා ගේ පැස තුළ බිජු තැන්පත් කරන අතර පැස තුළ දී බිත්තර සංසේචනය වෙයි. බිත්තර දමා දින 12ක්‌ පමණගත වූ පසු බිහි වන පැටවුන් සංඛ්‍යාවෙන් විවිධ වෙයි. සොයාගෙන ඇති අන්දමට වරකටපැටවුන් 100ත් 200ත් අතර ප්‍රමාණයක්‌ මෙන්ම වරකට පැටවුන් 5 දෙනකු පමණ බිහි කරනවිශේෂ ද ඇත. ගැහැනු සතා පිරිමි සතා ගේ පැස තුළ බිත්තර තැන්පත් කිරීමෙන් පසු පිරිමි සතා පැස පුම්බාගෙන සිටින ආකාරයක්‌ පෙන්නුම් කරයි.
තවත් සුවිශේෂී ලක්‌ෂණයක්‌ නම් සාමාන්‍යයෙන් මුහුදේ වෙසෙන මත්ස්‍යයන් කෘත්‍රිමව අභිජනනය කිරීම හෙවත් ස්‌වාභාවික පරිසරයෙන් බැහැර ව අභිජනනය කිරීම අපහසු දෙයක්‌ වුවත් මුහුදු අශ්වයින් කෘත්‍රීමව අභිජනන කිරීමට ඇති හැකියාවයි.
පොදුවේ ගත් කල ඉතා ම සෙමින් සිරස්‌ව කෙළින් පිහිනා යැමේ රටාවක්‌ අනුගමනය කරන මුහුදු අශ්වයන් පිහිනා යැම සඳහා පෘෂ්ඨීය වරල (Dorsal fin) ද, ශරීරය හැරවීම සඳහා සුක්‌කානමක්‌ ලෙස ඇස්‌ දෙපස පිහිටා ඇති ළය වරල (Pectoral fin) ද යොදා ගනිති. වෙනත් මත්ස්‍ය විශේෂවලට මෙන් පෞච්ඡ වරලක්‌ (Caudal fin) නොමැති වීම නිසා වේගවත්ව පිහිනා යැමට අපහසු ය. එබැවින් සතුරන්ට ගොදුරු වීමත්, කුණාටුවලට ගසාගෙන යැමත් මොවුන් විනාශ වීමට බලපාන ස්‌වාභාවික හේතු වෙයි.
මුහුදු අශ්වයා විසිතුරු මත්ස්‍යයකු ලෙසත්, විවිධ රටවල ඖෂධ පිණිසත් ප්‍රයෝජනයට ගැනීම හා ආහාරයක් ලෙස යොදා ගැනීම නිසා සහ කෘත්‍රීම පරිසරයක අභිජනනය කළ හැකි වීම, ටැංකිවල ඇති කිරීමට ඇති හැකියාව හේතුවෙන් ඉහළ මිලකට වෙළෙඳපොළේ විකිණෙන බවට කරුණු හෙළි වී ඇත. ප්‍රමානයෙන් මෙන්ම බරින්ද කුඩා ජීවීන වන මුහුදු අශ්වයන් කිලෝ එකක බරක් සදහා හාරසීයක් පමන ජීවීන් නිරපරාදේ ඝාතනය කරනු ලබයි.බොහෝ රටවල් මුහුදු අශ්ව අපනයනය තහනම් කර ඇතත් ශ්‍රී ලංකාව මේ වන විට එවන් තීරණයකට එළඹී නැත. එබැවින් මේ සඳහා නීති සම්පාදනය විය යුතු ය.
0 comments:
Post a Comment